Араншин

Сонин араншин байдаг юм. Заримдаа гайхдагын. Хааяадаа баярладагын. Гэхдээ гутардаггүй.


Хүн дуурайх, элэглэх ялангуяа өөрийнхөө байгаа төрх, зан араншинг эвдэн өөр болох энэ тэр их сонин санагддаг юм.

Үнэндээ тэгж чаддаггүй юм.

Жишээ нь: Найзын төрсөн өдөр болно. Хүмүүс хамаг сайхнаа л барьж ирдэг тийм үү. Зарим нэг нь чадлаараа л сайхан гэсэн зүйлийг авчирсан байхад нөгөө хэсэг нь түрийвчээ хоосортол өөртөө ч авч байгаагүй зүйлийг авч ирнэ.

Яагаад гэвэл тэр бол сайхан, сайны дүр төрх гэж боддогт байгаа юм.

Би тэгж самбагнаж чаддагүй. Ийм тохиолдолд Тэмээчин Бүсгүйг хамгийн сайн илэрхийлэх тэр зүйл юу вэ л гэж боддог. Түүнийг олдог.

Миний сэтгэлээс урган гарсан нэг мянган төгрөгний үнэтэй зүйл байсан ч гэсэн би ичих ч үгүй аваачаад л өргөн барьчихна. Харин ч амархан.

Зарим хүмүүс гайхдаг бүр алмайрдаг байлгүй. Алмайруулж ч ирсэн цаашид ч алмайруулах болно.

Ингэлээ л дээ.

Найман жилд манай ангийнхан Цагаан Сараар бэлэг солилцох болдог юм байна. Амрахаасаа өмнө нэрээ сугалаад Цагаан Сарын дараа ирэхдээ бэлэгээ бэлдэж ирэхээр болов оо.

Би бэлэг сугалсан өдөр л юу өгөхөө бодоод олчихсон байсан.

Амралт, Цагаан сар дууслаа. Өө манай ангийхан чинь эрээн, мяраан зүйлс, чихэр жимс сүртэй сүртэй л бэлэг солилцож гарч байна.

Наашаа, цаашаа явдаг наймаачин, худалдаачин айлын хүүхдүүд чинь цамц, оймс, тосон будаг юу юу ч билээ дээ сайхан сайхан зүйлс зөндөө л харагдаж байсан.

Миний муу аав, ээж хоёр тийм юм тарьж, ургуулах биш дээ.

Би ширээний нүдэндээ нэг зургийн дэвтэр дээр нь нэг гүзээний булаан цагаан тос тавьчихсан, жаахан сандарсан байдалтай сууж байлаа.

Хүмүүс ч бэлгээ тараагаад дөхлөө. Би нөгөө зургийн дэвтэр дээрээ гүзээтэй тосоо тавиад сугалсан хүүхэд рүүгээ чиглээд алхлаа даа. Багш тэнд шүлс нь гоожоод, дуу алдаад, манай ангийхан миний өмнөөс ичээд тэрүүгээр л нэг юм болов.

Тэр долоо хоногтоо л манай ангийхан гэртээ очихдоо манай ангийн нөгөө хөдөөний ТБ сугалсан хүүхэддээ шар тос өгсий ш дээ ва ха ха ха ха гэж баахан ярив.

Оюутан боллоо. Оюутны ангийхан бас нэг Цагаан Сараар бэлэг солилцох юм боллоо. Хаа очиж би найз охиноо сугалаатлаа.

Амралтаараа хөдөө яваад ирэхдээ юу аваад ирэхээ мэдээд, ирлээ дээ. Хичээлийн эхний өдөр гэрийг нь заалгаад авлаа.

Оройхон гүзээтэй хоньны махаа үүрээд шууд гэрт нь аваачаад энэ миний бэлэг гээд өгчихсөн. Найз охин (хотынх) шоконд ороод ээж нь тэнд нүд нь томроод л үлдсэн дээ. Дараа сонсох нь ээ тэднийх анх удаа хөдөөний ориг мах идсэн гэнэ лээ.

Гэх мэтээр би ингээд яг бавын байгаагаараа байж байхдаа ихэд сэтгэл хангалуун хүн шүү дээ.