Онгоц унав

Ааа ямар аймаар сенсаацилаг гарчиг болчиховоо.

Өчигдөр энэ улсад гурван онгоц унаж хоёр хүний алтан амь эрсэджээ.

Хамгийн олон зорчигчтой нь эндхийн Manitoba (Англи хэлээр ярьдаг муж) мужийн нэг жижиг тосгоноос хөөрсөн Cessna 208 онгоц байсан бөгөөд хөөрөөл унасан байна бурхан минь.

Онгоцны буудлаас холгүй гэхээр хөөрөөд дээшилж байгаад унажээ. Нийт 8 зорчигч байснаас нисгэгч нь амиа алдсан байна. Ум мани бадми хум.

Бусад долоо нь аминд хал бус хүнд бэртэл авчээ. Хамгийн их сэтгэл эмзэглэж байгаа явдал нь зорчигчид нь тэр хавьд уурхайн малталт хийж буй компаний газрын гүний уурхайчид ажээ.

Бүхэл бүтэн нэг ээлжний уурхайчид 20 хоног газрын гүнд ажиллаад гэртээ харихаар инээмсэглэл цацруулан онгоцонд суутал ингээд бэртээд, хөл, гар нь хугарсан байна гэдэг бол үнэхээр том гамшиг.

Энэхүү авиа компани нь гэр бүлийн бизнес бөгөөд тухайн онгоцыг хүү нь жолоодож явсан бөгөөд харамсалтайгаар амиа алджээ.

Гол нь энэ жижиг тосгон нь маш алслагдсан дээрээс нь цас ихтэй, цаг агаар муу байгаагаас ослын газарт яаралтай эрэл, хайгуул тусламж үзүүлэхэд нэлээд хүндрэлтэй байсан төдийгүй бүтэн цагийн дараа ослын газарт аврах баг, гал унтраах анги, Канадын тусгай хүчнийхэн очсон байна.

Осол болсон газраас тухайн тосгон хүртэл 25 км-т осолдогсодыг цасны мотоциклоор зөөсөн гэхээр тэнд бараг зуд болж байгаа гэж ойлгохоор.

Хэдий дээш өндөрт хөөрөөгүй байсан ч гэсэн онгоц унаад тэгээд амьд гарна гэдэг бол хувь тавилан, заяа түшлээ гэж л ойлгох хэрэг байх.

Зурагнаас харахад онгоцны их бие нь авах юмгүй л харагдаж байна.

Гол нь тэр 7 зорчигчын нэг нь 911-т дуудлага өгсөн гэж байна.

Одоогоор ослын шалтгаан тодорхойгүй байгаа бөгөөд зохих яамны ажилтан, шинжээч нар ослын газар дээр ажиллаж байгаа юм байна.

Энэ тухай бичих болсон шалтгаан нь хоёр зүйлд оршиж байгаа юм.

Нэгдүгээрт хаа газрын хүнд хэцүү нөхцөлд, хэд дахин хүнд ажил хийдэг уурхайчдын тухай ийм мэдээлэл сонсохоор сэтгэл үнэхээр эмзэглэдэг юм.

Тэдний ажилын байран дээр осол гарах магадлал маш өндөр учираас осол, авааргүй ажиллаад гэртээ харих замдаа ингээд бэртэнэ гэдэг маш харамсалтай.

Өнөөдрөөс эхлээд эндхийн уурхайнууд ажилчидаа зам тээврээр зөөвөрлөхөөр нухацтай хэлэлцэж эхэлсэн байна.

Гэвч машинаар явахад ч бэрх тийм хол, алслагдсан, зэлүүд газар зөндөө бий.

Хоёрдугаарт хувийн компаний онгоц байгаад хариуцлага алдав уу, үнэхээр чадвар дутагдав уу, эсвэл цаг агаарын байдлыг зөрчив үү. Бас бодох л асуудал тийм үү.

Дашрамд хэлэхэд онгоцонд ер нь аль болох хамгийн ард сууж бай гээд нэг юм би сонссон байхын.