Мөрөөдөл

Ганц удаа энд мөрөөдлөө биччихье!

Мөрөөдөж амьдарна гэдэг бас их сонин юм. Мөрөөдөхөд яалт ч үгүй цаг хугацаа хэрэгтэй юм байна.

Одоо тэр НУУЦ гэдэг номон дээр бол бүр дүрсжүүлээд, дуу оруулаад (ганцаараа ярих) мөрөөдөх хэрэгтэй гэдэг юм байна лээ.

Надад мөрөөдөл бий бий. Цаадах чинь том мөрөөдөж эгэл амьдарна шүү дээ.

Мөрөөдөл чинь бас хэзээ, хэрхэн, яаж биелэх мөн биелэх боломж байгаа эсэхээсээ хамаараад их олон ангид хуваагдаж магадгүй.

Миний энэ мөрөөдөл бол биелэх боломжтой аан гэхдээ бас их хол байгаа мөрөөдөл юм.

Энэ болбоос дэлгэцэнд дүрээ мөнхлөх шүү дээ. Миний хувьд ямар нэгэн од, нар, сар болох гэдэг утгаараа биш аан харин надад заяасан жүжигчин болох ганцхан хувь авьяасыг ашиглах явдал байгаа юм.

Яагаад ингэж байна вэ гэхээр би 20 насандаа ёстой шажигнасан бяр, хүч амтагдсан үеийнхэнтэй мөр зэрэгцэн ажиллаж явлаа.

Дөрвөн жил нэг тогоонд чанагдана (нэг газар амьдрах ажиллах, мөн нэг тогооноос хоол идэх) гэдэг бага хугацаа биш. Муудах, сайдах, үл ойлголцох, ойлголцох, буруу бодох, ууж, идэх, баярлах, гуних ... гэх мэт сайн, муу олон асуудал тулгарна.

Тэр их ажил, амьдралын тоосон дундаас миний найзууд намайг таньж чадсан юм. Би үүнийг таньсан биш таньж чадсан гэж дүгнэдэг.

Нэг биш нэлээд нь надад хэлж байсан.

- ТБ чи СУИС-т шалгалт өгөөд үз.
- ТБ чи нэг кинонд дуу оруулаад үз. Би хүнтэй холбоод өгье гэж.
- ТБ чи мэргэжилээ буруу сонгожээ... гэх мэт

Би нээх тоогоогүй. Яагаад гэвэл жүжигчин болно гэдэг хэт хол санаа байсан. Хүмүүс ярьдаг даа. Манайд урлагийн хүн байдаг, үгүй гээд л. Тэр нь ч байж магадгүй.

Гэхдээ би энэ мөрөөдөлөө нээх хийсвэр бодоод эсвэл дөвийлгөмөөргүй санагддаг. Яагаад гэвэл энэ миний сэтгэлийн уг, зүрхний гүнээс гарч байгаа харам бодол.

Ялангуяа ашиг, хонжоо хөөсөн тал уруугаа бол бүр болохгүй. Би угаасаа ийм юмнаас алсуур даялдаг хүн.

Жаахан ойрхон тусгаад зүйрлэж хэлвэл Д. Бямбасүрэнгийн (Ингэн нулимс киноны зохиолч) хийдэг кино надад жаахан ойрхон тусдаг юм.

Нэгдүгээрт жүжигчин хүн бус энгийн иргэд тоглодог. Хоёрдугаарт яг байгаагаараа гардаг. Гэхдээ үүнд бас тодорхой хэмжээний жүжиглэлт орох байх.

Нөгөөтэйгүүр одоогийн нөхцөлд кинонд дүр авна энэ тэр гэдэг хэцүүхэн л юм сонсогддог юм. Тийм болохоор яг одоо бол миний цаг хугацаа биш. Нөгөө үгээр хэлбэл жинхэнэ зүүд гэсэн үг.

Нас тогтох сайхан гээд нэг дуу байдаг даа. Тэгээд нас тогтоод ирэхээр учигийн үзүүр олдоно байх гэж найддаг.

Тэнгэрт байгаа мөрөөдөл рүү нээх яараад яахав. Аан гэхдээ хааяа хааяа санаж явбал бүтнээ гэж боддог.

Мөрөөдөл бүхэн биелэх болтугай!