Баярлалаа

Миний энэ олон бичлэг хүнд хүрсэн нь хэд юм гэхээс та бүхний бичлэг бүхэн цэцэг, жимс шиг үр өгөөжтэй байсан шүү. Та нартаа баярлалаа.

2012 онд та нарынхаа ач буян, өргөн мэдлэг, чин сэтгэлийн зөвлөгөөгөөр ТБ нь маш их өөрчлөгдөж, амьдралын шинэ горимд орлоо.

Нэр усыг нь дурдалгүйгээр манай саахалт айлууд бүгдээрээ ааш зан сайтай, арвин их эрдэм мэдлэгтэй, амьдралын агуу их туршлагатай хүмүүс шүү гэдэгийг энд онцолж хэлье!

Өөрчлөлт, шинэ горим гээд байгаагын учир нь Гилийн Хатан эгчийн энэ бичлэгийг уншаад газтай ундаа уухаа бүр зогсоосон. Би гэхдээ хааяа Sprite, Pepsi diet уучдаг байлаа. Энэ бичлэгийг уншаад би хөргөгчөө нээж үзэхэд надад 2 Pepsi diet үлдсэн байлаа.

Түүнийг хоёр өдөр ууж орхиод түүнээс хойш энэ ундаанаас татгалзаад зөвхөн усаар биеэ тэжээгээд улам, залуужаад сайхан явж байна. Баярлалаа Гилийн Хатан эгчээ.

Топ модель Д.Пүрэвсүрэнгийн нууц нь хаа явсан газраа ус уух юм гэнэ лээ. Би тэр хүүхэн шиг топ явна гэж юу байхав. Аан гэхдээ өөрийнхөө хэмжээнд ТОП явна гэдэг бол хамгаас сайхан.

Дараагаар нь манай Гуталчин бүсгүйн "Сайхан хүүхэн болмоор л байна ш дээ" гэсэн бичлэгээс 10 цагаас шөнө 2 хүртэл цагийн хооронд унтах ёстойг мэдэж, түүнээс хойш 3 хоногийн дараагаар 10 цаг гэхэд орондоо орж, том өөрчлөлт хийлээ. 

Яг тэр үед би шөнө 1,2 цагаас нааш унтахаа больсон байлаа. Ус агаар шиг хэрэгтэй байсан сайхан бичлэг бичсэн Гуталчин бүсгүйдээ баярлалаа. 

Гэх мэт олон содон, соргог болоод танин мэдэхүйн бичлэг бичдэг бүх блогчиддоо баярлалаа. 

Би ингээл үзсэн чинь миний бичлэг дандаа л нэг бүтэлгүй түүхээр эхэлж, уншигчид маань харамгүй сайхан сэтгэл, цаг заваа урсган ухаалаг, нандин, чин сэтгэлийн зөвлөгөө өгсөн зөндөө сайхан сэтгэгдэл байх юм. 

Тэгэхээр үнэт зөвлөгөө өгдөг, өгч байсан, өгсөөр ч байх уншигчиддаа баярлалаа. 

Ингээд Тэмээчин Бүсгүйн зүгээс та бүхэндээ 2013 ондоо эрүүл энх байж, хүсч төлөвлөсөн бүхнээ биелүүлж, агуу их хайраар өлгийдүүлж явахын ерөөл дэвшүүлье!

ШИНЭ ГАРСАН ЖИЛДЭЭ ШИЖГЭР АМЖИЛТ ГАРГААРАЙ!