Том байшинд амьдрах нь

Аймаар том байшинд байнга л хүнтэй хамт байхгүй бол ганцаараа ч нэг л ёозгүй шүү.

Манай айлынхан байнга найр, наадам, гадуур хооллох гээд явчихна. Манай хоёр хүүхэн ажилаа тараад ирэхгүй. Бас хүн хартай уулзаад алга болчихно.

Хичээлээ тараал шууд гэртээ ирдэг нь би. Дээр бүр ганцаараа энэ гурван давхар байшинд хоносы ш дээ.

Ёстой аймаар эвгүй юм билээ. Том байшин чинь одоо доор ч юм дуугарах шиг дээр ч юм дуугарах шиг. Салхи ч сэвэлзэх шиг…Ханхайгаад нэг л эвгүй.

Дэв дав гээд унтаж чадаагүй ш дээ. Ядаж байхад нэг спорт машинтай хүн ирээд хонх дараад болдоггүй. Би гүрийгээд, хаалга маалга эвдлээд ороод ирэх вий гээд элдэв долоон юм бодноо.

Маргааш нь айлын авгайд хэлсэн чинь чи ёстой битгий ай. Манай энэ чинь NEIGHBORHOOD WATCH тийм юм байхгүй л гээд томорсон.

Өнөөдөр бас л бүгдээрээ алга болчихын. Сая бас нэг спорт загварын машинтай хүн ирээд хонх дарж дарж л явлаа. Би хөшигөө хаагаагүй байсан. Гүрийсээр байгаад л явуулчихлаа.

Ишш хотод бол муу умгар байшиндаа хонх монх дуугарвал гэтэж очоол гялс дурангаараа хараал тээн, тэгээл одоо тун байдал болохоо байлаа гэхэд айлгаж сүрдүүлэх юм олды ш дээ. Ядаж л шалны модоо бариал зогсоно биз дээ. Тийм үү үгүй юу?

Би ч мөн аймхай лүд юм даа.

Эсрэгээрээ би хөдөө бол тоохгүй ш дээ. Гадаа хонь мал, нохой мохой өчнөөн юм байна. 14, 15 тайгаасаа л гэртээ ганцаараа малаа хараал цөөн хоногоор үлддэг л байсан. Тун болохоо байвал хоттой хонин дотроо ороол нам унтчихна шүү дээ.

Муусайн босс ямаанууд ирж шөнө ууцан дээр гишгээд байдгыг бодвол асуудал гайгүй. Ямааны ноолуур чинь хажуунаас пийшин шиг халуу оргиод тун чиг дулаахан хононо шүү дээ.

Гэхдээ хонь бараадаж хэвтвэл дажгүй. Хонь нэг хэвтэрээ оллоо. Яг тэндээ хэвтсээрээ байгаал өглөө болгоно. Ямаа бол байхгүй. Алцагнаал шөнө хэд дахин хэвтэрээ сольно. Хонь бараадахаар хуцанд мөргүүлчих гээд тэгээл сонголтгүй яравгар ямаануудтайгаа үзэж тарна даа.


Энэ тэнэмэл хүмүүс гэртээ хурдан ирээсэй. Айлын хүүхдүүд байхаараа орьлолдож чарлалдаад байхгүй болохоороо нам гүм хоосон оргиод байдаг сонин шүү.