Аяга угааж сурсан нь

8 сарын 31-нд Со хоолон газартаа хамгийн сүүлийн өдөр ажиллаад, Аниа бид 2 дурсамжын угаалт хийв.


Аниа нээх хөөрхөн өглөө очсон чинь за өнөөдөр дүүтэйгээ дурсамжын угаалт хийх нь байна шүү дээ гэчихсэн зогсож байсан. Бид 2 их сайхан гар нийлж угаанаа. Бие биенээ уралдаж, хайрлаж халамжлаад үнэхээр сайхан.

Гурван сар гаруй аяга угааж овойж оцойтлоо баяжсангүй. Байрны мөнгөө төлсөн. Утас, унааны мөнгө за тэгээд хоолны мөнгөө төллөө. 7 хоног сайхан аялчихаадд ирлээ. Одоо энэнээс өөр юу хүсхэв дээ тиймээ. Байгаа амьдралдаа сэтгэл хангалуун байж чадаж байгаа минь аз жаргал юм даа.

Canada Goose-ийн ганц куртка авья гэсэн чинь тэр куртка бас тийм ч гоё биш юмаа. Бараг 800 долларын үнэтэй куртка шүү дээ.

Сүүлийн өдөр шөнө бараг 12 гээд ажилаа тараад гарах болсон манай дарга асууж байна. Энэ ажил ер нь хүнд байна уу? Чамд хэцүү байсан уу? Амралтын өдрүүдээр ажиллахгүй юм уу? Өвөл амралтаараа ажиллавал хэлээрэй гэж байна шүү.

Би хэллээ. Эмэгтэй хүнд 14 цаг аяга угаагаад, яг зогсоод дээрээс нь тэр их аяга шанагыг нааш цааш зөөнө гэдэг бол үнэхээр ахадсан ажил байна. Хагас цагаар бол гайгүй. Бүтэн цагаар бол үнэхээр хүнд гэж хэлсэн.

Манай дарга чадвал бас дээд боловсролтой аяга угаагчтай байх санаатай хэ хэ хэ. Сайн хүн байна уу л гээд байх нь тэр.

Одоо тэгээд сайлж муулсаар байгаад ямар ч байсан ард нь гарлаа. Гарандаа их санаа зовж байсан. Харин чиг их гайгүй байгаа. 14 цаг аяга савандахаар чинь бугуй бас өвддийн байна шүү.

Ямар ч байсан урд нь аяга сав угаадаг байсан арга чарга орвонгоороо өөрчлөгдсөн. Мэргэшиж л эхэлсэн байх. Удаан ажилласан манай Жоохноо энэ тэр мастер гэсэн шүү хэ хэ хэ.

Одоо тэгээд олсон мөнгөө идсэн уусантайгаа тайлангаа тавьмаар санагдаад болдоггүй. Дараа бас өөртөө дурсамж болгож үлдээж байгаа нь энэ. Сард 10 000 долларын ажил хийдэг болхоороо үүнийгээ харж инээж, баясанаа.

Муу ажил гэж байдаггүй. Гагцхүү тэр муу ажил гэдэг нь хүнд их зүйлийг ойлгуулдаг гээд тэр нөгөө Гого тахины эзэн биччихсэн байна лээ ш дээ. Би бас тэгж бодов. Аяга угааж үнэхээр л их юм бодож үзлээ.

Би ч тэгээд нарийн ширийн жижиг юман дээр дуу алдаад, сэтгэл ханамж авч зогсдог хүн шүү дээ ва ха ха ха ха. Одоо яах уу дээ тээн.

За нийт 3.3 сар аяга угаасан байна. Энэ хугацаандаа 3950 доллар олжээ. Үүнээс байрныхаа мөнгөнд 1350 доллар төлсөн байна. Утсанд 200$, унаанд 260$, хичээлийн номны үнэ 50$, хүнсэнд 200$, аялалд 800$, 250$ гоо сайханд, 150$ баахан уран зохиолын ном Амазоноос авсан.

Өөртөө энэ зун 60 доллараар л юм авлаа ш дээ. Нэг усны шаахай, 2 хүзүүний алчуур тэгээл болоо. За тэгээд үлдсэн нь одоо дансанд.

Одоо тэгээд шуудай гурил, хамгийн хямд мах тэгээд жаал ногоо авчихаад үзээд байна шүү дээ. Гадуур хоол идэхгүй. Ус буцалгаж авч яваал за тэгээд болно доо болно.

Со хоолон газар ажиллаад ядаж ганц хоол хийж сурья гэж бодож байсан юм. Кимчи хийхийг хэд хэд харсан. Дараа нэг тав тухтай туршиж үзээд суусан газраасаа шороо атгасан эсэхээ хэлий нөхдөө.

Гар хөдөлбөл ам тосдоно ...