365

Сайхан баярлацгаасан биз дээ. Би ч бүр архагшаад бууз ч хийж идсэнгүй.

Өчигдөр өглөө Монголд он солигдож байхад жаахан сэтгэл хөөрөөд энд он солигдсон чинь сэтгэл хөөрдөггүй гэнээ.

УБ тв шууд үзэх гэсэн чинь гацаад тэгсэн Монгол тв гацахгүй гарч байсан байна лээ ш дээ. Баярын мишээлийг дуусах гэж байхад нь л үзлээ.

Тэр Төрийн Соёрхолт Болдтой дуулаад байгаа хүүхэн хэн бэ? Шуранхай хамтлагийн хүүхнүүдийн нэг мөн үү?

Тэгээд яахав ёсыг бодож 11-45т сэрүүлэг тавьж байж босоод улаан, ногоон, цагаан өнгийн лаа асааж байгаад он солигдоход хүслээ шивнээд, 400 гр алимны дарс байснаа задалж уучаал буцаад унтаад өглөө.


Одоо өнгөрсөн жил 365 бичлэг шахсан бахдам амжилтынхаа учир шалтгааныг тайлбарламой.

2011 оны сүүлээр нэг л нэг сайхан бичдэг болмоор санагдлаа. Amazon-оос 3 ширхэг хэрхэн сайн бичдэг болох вэ гэсэн үнэгүй ном Kindle-дээ авч уншлаа.

Тэр гурав юу гэж байсан бэ гэхээр ерөөсөө л бич, бичээд байх хэрэгтэй. Ердөө л энэ.

Өдөр болгон 3 өгүүлбэр ч гэсэн бичиж байж хэмээнэ сайн бичдэг болно гэж өгүүлсэн байлаа.

Гэнэт бодов. Хаанаа, юугаа тэгж бичих билээ гэсэн чинь хайрт блог минь гэнэт санаанд ороод ингээд өдөр бүхэн бичлэг бичихээр өөртөө ам, тангараг тавиад биелүүлсэн минь энэ.

Дөнгөж сая 2012 оны анхны болоод сүүлийн бичлэгээ харьцуулж уншихад ямар ч байсан хонгилын үзүүрт гэрэл туссан юм шиг санагдлаа.

Нэг сумаар нэг биш нэлээд хэдэн туулай буудаж амжжээ. Цаг хугацааны мөч бүхэн эргээд хайрлам бас өхөөрдөм дурсамж болон үлддэг учираас 365 бичлэг маань сайн сайхан бас саар бүхнийг агуулсан адал явдалт түүх болон үлдлээ.

Хэрэв та бүхэн ажигласан бол би энэ 365 бичлэгтээ нэг ч удаа бичих сэдэв олдохгүй нь гэж дурьдаж байгаагүй.

Учир нь үнэхээр тийм бодол орж ирж байсан уу гэвэл ТИЙМ. Харин асуудлаас гарахад арга зам байсан уу гэвэл зөндөө байсан, түүнийг олж чадсан.


2013 онд өдөр бүр бичлэг хийнэ гэж амлаж чадахгүй. Харин өгөөж, үр шим ихтэй бичлэг богино хугацаанд оруулж байна гэдгээ амлаж байна.

Шинэ ондоо блог ертөнцийн бал бурам шиг бичлэг түм бумаараа нэмэгдэх болтугай гэж ерөөе!